Bermeoko Udala

• Kolonbiako eta Kanarietako taldeek, Alkartasuna Dantza Taldearen 50. urteurrenarekin bat eginez, kultur aniztasuna eta euskal tradizioa batuko dituzte abuztuaren 8an, zapatuan, Lameran

Bermeok XXXVIII. Nazioarteko Folklore Jaialdia hartuko du abuztuaren 8an, zapatuan. 1986tik etenik gabe antolatzen den hitzordu honek munduko hainbat herrialdetako folklorea herrira ekartzen du urtero, eta, aldi berean, Bermeoko kultura eta euskal dantza tradizionala nazioarteko taldeekin partekatzeko aukera eskaintzen du. Bermeon izan ditugu, besteak beste, Indonesia, Egipto, Martinika uharteak eta Argentina bezalako herrialde eta lurraldeetako taldeak, jaialdiaren nazioarteko izaera eta kultur aniztasunarekiko konpromisoa sendotuz. Iaz bezala, aurtengo jaialdia ere aire zabalean egingo da, Lameran, 20:30ean hasita.

Urte hauetan guztietan, jaialdiak kulturen arteko topagune izatea lortu du, folklorearen bidez herrien arteko harremanak estutuz eta kultura-aniztasuna balioan jarriz. Hori dela eta, udako kultur egitarauko hitzordu finkatuenetako bat bihurtu da.

Aurten, Kolonbiatik etorritako Show Dance – Cuerpos en Movimiento taldeak parte hartuko du. Sabanetako (Antioquia) La Barquereña Kultur Etxeko dantza eskolako kideek osatzen dute taldea, eta urtean berrogeita hamar emanalditik gora eskaintzen dituzte. Haien ikuskizunak Kolonbiako eskualde desberdinetako dantza tradizionalak uztartzen ditu —Andeetako, Pazifikoko eta Karibeko erritmoak, besteak beste—, herrialdearen aberastasun kulturala eta folklorearen aniztasuna erakutsiz.

Kanaria Handitik dator, berriz, bigarren urtez, Agrupación Folklórica San Cristóbal taldea. 1963an sortua, Kanarietako folklorearen erreferenteetako bat da, eta sei hamarkadatik gorako ibilbidean kantu, musika eta dantza tradizionalak zaindu eta zabaltzeko lan handia egin du. Bere errepertorio zabala eta nazioarteko jaialdietan izandako presentzia nabarmena direla medio, Kanarietako kultura tradizionalaren ordezkari nagusietako bat da gaur egun.

Nazioarteko taldeekin batera, Bermeoko Alkartasuna Dantza Taldea izango da jaialdiko anfitrioia. Gainera, aurten, bere 50. urteurrena ospatzen ari denez, aurtengo edizioak esanahi berezia izango du taldearentzat. Mende erdiz euskal dantza tradizionala zaintzen, sustatzen eta belaunaldiz belaunaldi transmititzen egindako lana ospatzeko urtean, Folklore Jaialdia ospakizun horrekin bat egingo duen hitzordu berezia izango da. Hartara, publikoak euskal dantza tradizionalekin eta munduko beste hainbat herrialdetako folklore-adierazpenekin gozatzeko aukera izango du.

Jaialdiaren aurkezpenean, Endika Etxebarria Telleria kultura zinegotziak nabarmendu duenez, «XXXVIII. Nazioarteko Folklore Jaialdia Bermeoren nortasun kulturalaren parte da dagoeneko. Urtero munduko hainbat txokotako folklorea gure herrira ekartzen du, eta, aldi berean, gure kultura eta tradizioak partekatzeko aukera eskaintzen du. Aurten, gainera, jaialdia Alkartasuna Dantza Taldearen 50. urteurrenarekin bat dator».

Zinegotziak, halaber, herritarrak eta bisitariak jaialdian parte hartzera gonbidatu ditu: «Kalitate handiko ikuskizuna izango da, kultur aniztasuna eta tradizioa protagonista izango dituena, horregatik, Lamerara hurbiltzera animatu nahi zaituztegu».

Bermeoko Udalak gogorarazi du XXXVIII. Nazioarteko Folklore Jaialdia aukera paregabea izango dela munduko hainbat txokotako kultura-adierazpenak bertatik bertara ezagutzeko, euskal dantza tradizionalarekin batera, giro paregabean eta herritar guztientzat zabalik.