Bermeoko Udala
Albisteak
Albistea
Busturialdeko gazteak zientzia, teknologia eta artearen inguruko orientazio eta trebakuntza jardunaldietan parte hartzen ari dira
- 340 ikasle inguru ari dira parte hartzen Gernika-Lumon eta Bermeon antolatutako jardunaldietan, Bizkaia Gazteak Busturialdea 2025-2027 lankidetza-hitzarmenaren baitan
Busturialdeko ikasle gazteak zientzia, teknologia eta arte arloetan orientatzeko eta trebatzeko antolatutako jardunaldietan parte hartzen ari dira. Gaur, Gernika-Lumon antolatutako saioetan daude, eta bihar, berriz, Bermeoko Artza frontoian egongo dira.
Gernika-Lumon, arlo zientifiko-teknikoari eskainitako topaketan, eskualde osoko 177 ikasle daude; 163 ikasle izango dira, berriz, Bermeon egingo den arlo artistiko-sozialari buruzko jardunaldian.
Jardunaldi hauek Bizkaiko Foru Aldundiaren eta Ajangiz, Arratzu, Bermeo, Busturia, Elantxobe, Ereño, Errigoiti, Forua, Gautegiz-Arteaga, Gernika-Lumo, Kortezubi, Mendata, Morga, Mundaka, Murueta, Muxika, Nabarniz eta Sukarrieta udalerrien artean sinatutako Bizkaia Gazteak Busturialdea 2025-2027 lankidetza-hitzarmenaren barruan kokatzen dira. Hitzarmenaren helburua da udalerri horietako gazteria arloko politika integrala ezarri, bultzatu eta garatzea.
Honako zentroek parte hartzen dute jardunaldietan:
- Gernika-Lumon: Urduliz 42, EHU Ingeniaritza, EHU Zientzia eta Teknologien Fakultatea, Tartanga, Zabalburu ikastetxea, Lea Artibai, Txorierri eta Zulaibar.
- Bermeon: Kunsthal, ECPV (Euskal Herriko Zine Eskola), EUNEIZ, Zabalburu ikastetxea, Lea Artibai eta Txorierri.
Horrez gain, erakusketa gune berezi batean, ikasleek goraka doazen teknologia berriak probatzeko aukera daukate: errealitate birtuala, beso robotikoak eta adimen artifizialeko aplikazioak, besteak beste. Teknologiaren arloko adituen eskutik, gazteek aukera dute tresna horiek zentroek eskaintzen dituzten prestakuntza-programetan eta etorkizuneko lan-errealitatean nola integratzen diren ulertzeko.
Proiektu honen baitan, eskualdeko DBH eta Batxilergoko gurasoei zuzendutako orientazio jardunaldiak aurreikusita daude 2026ko urte hasierarako. Azoka modura egingo den jardunaldian, Autonomia Erkidegoko goi-mailako ikasketa zentroek euren eskaintza erakutsiko dute.
Beste barriak
