Bermeoko Udala

• Herritarrak animatu gura dira hondakinen garbiketa kolektiboan parte hartzera, ingurumenarekiko kontzientzia indartzeko helburuz.

Datorren zapatuan, maiatzaren 31n, Bermeoko Udala eta Ura Gara talde ekologista elkarlanean ariko dira Let’s Clean Up Euskadi! izeneko ingurumen-garbiketa kanpainan. Ekimen honen helburua da herritarrak hondakinen prebentzioaren eta kudeaketa egokiaren garrantziaz jabetzea, eta modu aktiboan parte hartzea herria garbi mantentzeko bidean.

Let’s Clean Up Euskadi! ekimena Europa mailako Let’s Clean Up Europe! dinamika zabalaren baitan kokatzen da, eta bereziki hondakinak uzteko ohiturari aurre egitea du xede, guztiok sortzen ditugun hondakin horiek saihestu, murriztu eta birziklatzeko beharra azpimarratuz.

Bermeon, 10:00etan jarri dute hitzordua Talako kantinan. Bertan, ongietorria emango zaie parte-hartzaileei, ekimenaren nondik norakoak azalduko zaizkie eta lanerako taldeak osatuko dituzte. Ondoren, taldeetan banatuta, herriguneko lau gune nagusi garbituko dituzte:

• Tala eta Tonpoi ingurua
• Kanposantuko atzealdea eta Aritzatxu hondartza
• Baratz-Eder eta San Martin auzoko berdeguneak
• Landabaso industriagunea

Garbiketa egin ostean, bildutako hondakinak tipologiaren arabera sailkatuko dituzte: ontzi arinak, beira, errefusa… Hartara, bildutakoaren erregistroa egiteaz gain, birziklatze-lana ere erraztuko da.

Antolatzaileek parte-hartzaileentzako gomendio batzuk eman dituzte:

• Mendiko botak, eskularruak eta arropa erosoak eroan
• Gogoratu eguzkitako krema, bisera eta eguzkitako betaurrekoak
• Ez ahaztu ura
• Jateko zerbait ekar dezakezu
• Pertsona arduradunen argibideei kasu egin

Ekintza hau familian egiteko aproposa da, eta herritarren parte-hartzea ezinbestekoa da ingurune garbi eta iraunkor baten aldeko bidean. “Animatu, parte hartu eta gozatu goiz eder bat naturarekin harremanetan! Keinu txiki bakoitzak bere garrantzia du, guztion artean Bermeo txukunago bat izango dugu!”, adierazi dute udal ordezkariek.