Bermeoko Udala

• Bizkaiko Foru Aldundiak eta Taupa euskaltzaleen mugimenduak elkarlanean garatzen duten “Bizkaian bagara. Berbak zubi” programaren baitan, Batera Jauzi prozesua martxan jarriko da Bermeon, udalaren eta Etxalaken laguntzarekin Batera Bermeon izenpean, hurrengo sei hilabeteetan gauzatuko den jendarte elkarrizketa sendo baten bidez.

"Bizkaian bagara. Berbak zubi" programa euskararen erabileran eta aktibazioan eragiteko egitasmoa da. Bizkaiko Foru Aldundiak eta Taupa euskaltzaleen mugimenduak, udalarekin eta Etxalakekin elkarlanean martxan jarritako programak euskararen erabileraren inguruan askotariko herritarrak aktibatzea eta antolatzea du helburu.

Euskararen erabileran beharrezkoa den goranzko jauzia emateko euskararen aldeko komunitate aktiboak indartu nahi dira elkarlanean bideratuko den programarekin. Erabileraren aroan gaude eta erronka ez da bakarrik euskararen aldeko jarrera indartzea, baizik eta hizkuntza ohituretan eragiteko eta euskaraz bizitzeko aukerak zabaltzea.

Euskararen aldeko tokian tokiko sarea zabaldu eta aberasteko asmoarekin, Batera Jauzi martxan jarriko da Bermeon, azaroaren 12an egingo den aurkezpenarekin.

Batera Jauzi: herri mailako ikuspegia eta lehentasunak adosteko prozesua

Batera Bermeon euskararen erabileran jauzia emateko behar diren baldintzak adosteko bidelaguntza prozesua da. Herri mailan bisio eta akordio berri bat adosteko helburuarekin, hurrengo hamarkadarako lehentasunak adosteko ariketa egingo da.

Hori horrela, helburu zehatz gisa baditu euskararen aldeko sarea zabaltzea eta aberastea. Prozesua metodologia berri eta berritzailearekin eraiki da; Aldaketa Teoria eta enfoke sistemikoa ditu oinarri. Batera Bermeon prozesua aukera izango da herriko eragile, herritar eta euskaltzaleekin batera epe luzeko ikuspegia lantzeko, euskararen erabilera indartu eta komunitate sendoagoa eraikitzeko.

Aurkezpena azaroaren 12an izango da, osteguna.

18:45

Kultur etxeko hitzaldi aretoan